Baankiin Siinqee Aadaa Qusannaa Uummata Oromoo Jijjiiruun Diinagdee Oromoo Utubaa Jira.===Biiroon Kominikeeshinii Oromiyaa Baankii Siinqeetti Itti Aanaa Pirezidaantii Maayikiroo Faayinaansii fi Oppireeshinii baankichaa kan ta’an Obbo Geetaachoo Dheeressaa waliin hojii Baankiin Siinqee aadaa qusannaa uummata Oromoo jijjiiruu akkasumas, Warraaqsa dinagdee Oromoo tumsuuf hojjachaa jiruufi dhimmoota biroo irratti turtii taasiseera.Obbo Geetaachoon Baankiin Siinqee Waggoota 24 oliif WALQO ta`uun hojii micro finance hojjechaa turuun yeroo dhiyoo as gara baankiitti guddachuu ibsanii, kaayyoon isaa inni guddaan rakkoo dinagdee Oromoo hundeerraa furuu ta’uu ibsaniiru .Keessumattuu dinagdee qonnaan bultootaafi horsiise bultootaa akkasumas hawaasa sadarkaa gadii bira ga`uun rakkoo dinagdee isaanii furuuf yaadamee kan hundaa`e ta’uu eeraniiru.Baankichi erga hundaa`ee asitti hojii barbaaddota hedduuf liqii guddaa akka kenneefi warraaqsa dinagdee Oromoo saffisiisaa akka jirus obbo Getaachoon himuun, dhaabbilee misoomaa Oromiyaa kannen akka ‘Kenya beverage industry, Oro fresh’fi kanneen biroos jajjabeessaa akka jiru ibsaniiru. Hawaasni keenya qusannaa humna dinagdee ta’e hubatee aadaa qusannaa isaa akka fooyyeffatu hawaasa bal’aatti gadi bu’ee hubannoo uumuun baankii aadaa qusannaa hawaasichaa jijjiiredhas jedhan. Baankii Siinqee baankota biroo irraa wanti adda taasisu tajaajila ‘micro finance’ dabalataan kennuu,qonnaan bulaaf wabii malee liqeessuufi hojii qonna ceesisuuf hojjetamaa jiru tumsa taasisuu isaati jedhan.Bara 2017 qofa tiraaktaroota 1,402 qarshii biliyoona 2 oliin qonnaan bultootaaf liqaan bitee kan kenne ta’uus ibsaniiru.Qonnaan bultoota gareefi dhuunfaan gara investimentiitti ce`aniif liqii addaa “ Dita Loan ” jedhamu kennuu akka eegalee jiruufi qarshiin biliyoona 3 ol ta`u kennamuu ibsuun dhuunfaan immoo qonnaan bulaan lafa isaa qabsiisee hanga miliyoona tokkootti akka liqii fudhachuu danda`us himaniiru. Baankilee biroo caalaa dinagdee dubartootaa deggeruufis modaalitii lama qopheessuun qarshii biliyoona 6.5 ta`u liqiif mijeessuun hojjechaa jira.Baankichi yeroo WALQO ture kuufamni maallaqa isaa qarshii Biliyoona 7 qofa ture yeroo ammaa kuufama qarshii biliyoona 140 qabaachuu fi qarshii biliyoona 80 ol ta`us liqeessee akka jiru kan ibsan Obbo Geetaachoon dhibbantaan 63 qonnaan bultootaafi dhimma qonnaan walqabatan jajjabeessuuf kenname jedhan.Yeroo ammaa guutuu biyyaattitti dameewwan 600 fi hojjetoota kuma 13 qabaachuun hidhannoo teeknoloojiin tajaajila guutuu kennaa kan jiruufi maamila miliyoona 9,liqeeffattoota kuma 700, kappitaala biliyoona 15 kan qabuu ta`uufi waggoottan shanan dhufan kappitaalli isaa biliyoona 75 irra akka ga`uuf hojjetamaa jiraachuus ibsaniiru. Hawaasnis Baankii Siinqeetti akka qusatuufi irraas tajaajilamu akka qabu kaasuun Baankichi jawaasa baadiyyaa jireenya gadi aanaa jiraatu jijjiiruuf kan hundaa`e waan ta`eef baankicha guddisuuf waliin hojjechuun murteessaa ta’uu yaadachiisaniiru.