Doonald Tiraamp loltoota Ameerikaa tokkoo tokkoo isaaniif doolaara 1,700 ol kennufi. Birrii Itoophiyaan gara miliyeena lamaaf wodhakkaa te’a. Pireezidaanti Traamp miseensota loltuu tajaajila U.S. gara miliyoona tokkoo fi wodhakkaa te’aniif badhaasa beesee akka kennan dubbataniiru. Tokkoon tokkoon isaanii ”kaffaltii gootaa”’ doolaara kuma tokkoo fi dhibba torbaa fi torbaatamii ja’a kennuuf waadaa galaniiru. Kunille birri Itoophiyaan gara miliyoona lamaaf wodhakkaa te’a. Maallaqa kana keessaa gariin taarifa Tiraamp biyyotarra kaa’an irraa kan argamu jedhan. Roobii galgala dubbii televijiiniin biyyatti irratti taasisaniin, Tiraamp ”cheekiin barreeffameera”, kaffaltiin kun ayyaana Qilleef akka raawwatamu dubbataniiru. Bu’aawwan woggaa jalqabaa aangoo isaanii keessatti galmeessan kaasuun kan dhaadatan tiraamp “rakkoo jiru hundaa sirreessaa jirra,” jedhe. Bu’aa guddina dinagdee fi dhimma godaansaa irratti galmeessan kan dhageessisan yoo ta’u, Dimookiraatotas arrabsaniiru. Dubbii isaanii kana keessatti pireezidaantichi Ameerikaan daandii sirrii irra akka jirtu irra deddeebiin dubbataniiru. Tiraamp gatiin meeshaalee gadi bu’us, lammiileen Ameerikaa garuu gatii mana jireennaa, kunuunsa daa’immanii fi eegumsa fayyaatti akka hin gammanne eeran. Tiraamp haasaa daqiiqaa 18f taasisaniin, baasii waliigalaa ”kaffaltii goota” kanaaf bahu doolaara biiliyoona 2.57 akka ta’u fi ” maqaa bara hundeeffama keenyaa waggaa 1776’n kan moggaafamu ta’a” jechuun ibsan. Pireezidaantichi maallaqni kun taarifaa fi wixinee baajataa “wixinee guddaa fi bareedaa” jechuun waamu irraa akka dhufes dubbatan. ”Kun woraana keenna caalaa eennufillee hin malu,” jedhan. Tiraamp diinagdee biyyatti deebisanii kaasuu fi qaala’iinsa jireenyaa hir’isuuf tattaaffii taasisaa jiran irra deddeebiin kan jajan yoo ta’u, Pireezidaantii duraanii Joo Baayiden komatan. Tiraamp haasaa isaanii keessatti yeroo torba maqaa Baayiden kaasuun qeeqan. “Amma bulchiinsa haaraa jalatti qaala’iinsi jireennaa saffisa ajaa’ibaatiin gadi bu’aa jira. Dimookiraatonni gatii ol kaasaa jiraatanis rakkoo kana furuutti jirra.”jedhan. Ameerikaatti gar malee kan dabalee ture gatiin hanqaaquu fi zayitaa gadi bu’us, gatiin meeshaalee nyaataa biroo hanga ammaatti akkasumatti jira. Ragaan dinagdee baatii Fulbaanaa akka agarsiisutti qaala’iinsi jireennaa dhibbeentaa 3 yoo ta’u, fayyadamtoonni kana dandamachuuf rakkataa jiru. Baatii Sadaasaa darbe keessa Rippabilikaanonni kutaalee biyyattii hedduu keessatti dorgoman mo’amuun isaan muudateera. Tiraamp kufaatii paartii isaanii kanaaf gatiin meeshaalee dabalaa dhufuu komatan. Pireezidaantichi yeroo duula filannoo marsaa lammaffaaf jijjiirama ariifataa fiduuf waadaa galaniiru. Garuu baatii 11 pireezidaantummaa isaanii boodallee jijjiiramni ariifataan lammiileen Ameerikaa hedduun hawwaa turan ammallee hin dhugoomne. Tiraamp waggaa 250ffaa Ameerikaa karaa guddaa, bara Awurooppaa dhufu akka kabajan waadaa galaniiru.Jirra24/7 Goomaraa Godu’uu!