Itoophiyaa fi Morookoon walii galtee nageenyaa waliif mallatteessan Koomishinarri Janaraalaa Koomishinii Poolisii Federaalaa Dammallaash Gabramikaa’eel, Daarektara walii Galaa Nageenya Biyyaalessaa fi Daangaa Moorookoo Abdellaatiif Hammuuchii waliin walii galtee wal hubannoo dhimmoota tumsa nageenyaa biyyoota lameen jidduu cimsuu mallatteessuu isaanii gabaafame. Walii galteen kun kan mallatteeffame wayita wal gahii 93ffaa INTERPOL Maarrekech tti gaggeeffamu ta’uus himameera. Walii galtechi haala itti qaamoleen nageenyaa Moorookoo fi Itoophiyaa yakkawwan itti to’atan, yakkoota daangaan alatti raawwataman itti hordofan, sochii seeraan alaa, godaansa dhokataa fi yakka interneetiin raawwataman itti to’atan kan haammatudhas jedhame. Walgahiin INTREPOL 93ffaan Maarrakechi taasifamaa jiru hooggantoota jaarmayaalee nageenyaa biyyoottan addunyaa kan walitti fidu yoo tahu, innis Sadaasa 24 haga Sadaasa 27 tti dhimmoota yakka addunyaa mudataa jiran irratti xiyyeeffachuun gaggeeffama. Wal gahii guyyoota afran kanaaf taasifamu kana irrattis biyyoota 179 keessaa kana bahan hirmaattonni 800 oliifi ajajdoonni qaamolee poolisii biyyoottan addunyaa 82 irratti yoo argaman, INTERPOL dhaabbatichi ammoo dhimma dhaabbilee nageenya kabachiisan irratti yaada egeree kaa’a. Hirmaattonni wal gahii kanaas haala itti yakka daangaa darbu itti to’atan, nageenya addunyaaf akkaataa itti tumsanii fi waayee yakka interneetiin raawwatamuus walii galtee Gamtaa Mootummootaa ni mariyatan. Asumaanis Koree Hoji Raawwachiiftuu fi pireezidaantii INTERPOL itti aanu ni filu jedhameeti eegama. Jalqaba maree INTERPOL 93ffaa kana irratti Daarektara walii Galaa Nageenya Biyyaalessaa fi Daangaa Moorookoo Abdellaatiif Hammuuchii, “Moorokoon wal gahii kana kan keessummeessiteef, tumsa nageenyaa waloo cimsuuf of kenniinsa waan qabduufi yakkawwan daangaa cehan to’achuun barbaachisaa hagam akka ta’e waan hubattuuf” jedhan. Waxabajjii 2025, Moorookoo fi Itoophiyaan dhimma raayyaa waraanaa irratti walii galtee mallatteessuu isaanii Addis Standard gabaasuunsaa ni yaadatama. Walii glateen Waxabajjii 17 biyyoota lameen jidduutti Moorookoo Raabaatitti mallatteeffame, Koomishinii Raayyaa Ittisaa kan hojiirra oolmaa walii galtee kanaa hordofullee kana gad dhaabudha. Walii galtechi Ayishaa Mohammed, Ministeera Raayya Ittisaa Itoophiyaa fi Abdellixiif Loowudii Hoogganaa Bulchiinsa Raayyaa Ittisa Biyya Moorookootiin ka mallatteeffamee ture yoo ta’u, angawootni fi ajajoonni humna waraanaa biyyattiis irratti argamuun ni yaadatama.