”Dhibeen Vaayirasii Marbarg Oromiyaa keessatti hin Mul’anne!”Biiroon Fayyaa Oromiyaa erga Ministeerri Fayyaa Federaalaa Naannoo kibba Itiyoophiyaatti dhukkubni Hemoraajik Fiivarii gosa vayireesii marbargii mul’achuu mirkaneesseen booda naannoo keenya keessatti hojiiwwan ittisaa fi dammaqiinsa hawaasaa Kanneen akka eeruu fi ergaawwan bu’uura hin qabne adda baasuu fi odeeffannoo sirrii hawaasaaf kennuu, akkasumas miidiyaa hawaasaa irratti ta’e jedhamee sodaa hawaasa keessatti uumuuf gocha godhamaa ture hawaasni akka hin burjaajofneef ragaa sirrii fi hubannoo sirrii ta’e hawaasa biraan gahuu irratti argama. Akkuma beekkamu Naannoo keenya keessatti weerarri dhibeewwanii yeroo garaa garaatti ka’aa kan ture yoo ta’u, qindoomina Ogeeyyii fayyaa, hoggansa sadarkaan jiruu fi tumsa hawaasaatiin miidhaa cimaa osoo hin geessisin too’achuun danda’ameera. Dabalataanis,Yaadannoo yeroo dhiyoo kan ta’e dhukkuboota daddarboo kanneen akka weerara Tayifasii ‘Epidemic typhus fi Relapsing fever’ jedhamuun beekkaman Godinaaleen Harargee Lixaa fi Arsii aanaa itti wal daangessan keessatti ka’ee kan ture yoo ta’u, Biiroon Fayyaa Oromiyaa Godinaalee lamaan waliin ta’uun gandoota hedduu keessatti hojii hojjatameen dhibeewwan kanneen too’achuun danda’amee jira. Kanaan walqabates, uwwisa yaalii dhibee kanaatiin cinaatti hawaasaaf hubannoo kennuu dhaan hawaasni dhibeewwan kanaa fi kanneen birootiif akka hin saaxilamne hojjatamaa tureera;hojjatamaas jira. Haa ta’uu malee, odeeffannoo ragaa hin qabne miidiyaa hawaasaa irratti gadi lakkisuu dhaan dhukkubni vaayireesii Marbargii (marburg Virus)tiin daddarbu Godinaalee kanneen keessatti lubbuu namootaa baaseera jechuun ololli hafarfamaa jiru ragaa tokkolle kan hin qabne ta’uu Biiroon Fayyaa ibsuu barbaada. Hawaasni naannoo keenyaas burjaajii kanaan osoo hin dangeffamne of eggannoo gochaa ture akka cimsuu fi yeroo mallattooleen akka dhagna gubaa, bo’oo mataa jabaa, qaama caccabsaa, oldeebisuu fi teessisuun akkasumas dhiiga karaa funyaanii, afaanii, ijaa fi kan birootiin dhiiguu faa yoo jiraatan gara dhaabbilee fayyaa dhaquun yookaan ammoo sarara bilbila tolaa Biroo Fayyaa Oromiyaa 6955tti bilbiluun odeeffannoo fi gargaarsa barbaachisu argachuu kan dandeessan ta’uu ibsa. Biiroo Fayyaa Oromiyaa