Pirojeektii Galma Giddugala Aadaa Ardaa Jilaa Me’ee Bokkoo – Dhaabbata Ijaarsaa Walaabuu**************************Mootummaan Naannoo Oromiyaa aadaa, seenaa, duudhaa fi eenyummaa Oromoo guddisuuf xiyyeeffannoo ol’aanaadhaan hojjechaa jiraachuu, hoggantuun Biiroo Aadaa fi Tuuriizimii Oromiyaa aadde Jamiilaa Simbiruu himan. Akaatuma kanaan Giddugala Galaawwan Aadaa ijaarsiisuu fi bakkeewwan jilaa misoomsuun dhalootaaf bu’uura akka ta’u gochuudhaan hojiiwwan gurguddoo hojjechaa jira jedhan. Haaluma kanaan ijaarsa hojii pirojeektii Galma Giddu Gala Aadaa Ardaa Jilaa Me’ee Bokkoo Godina Gujiitti ijaarsisuuf Biiroon Aadaa fi Tuuriizimii Oromiyaa dhaabbata Ijaarsaa Walaabuu waliin walii galtee mallatteesseera. Hoggantuun Biiroo Aadaa fi Tuuriizimii Oromiyaa aadde Jamiilaa Simbiruu, jjaarsi guyyaa har’aa waliigalteen mallatteeffamee kunis gaaffii yeroo dheeraa hawaasa Godina Gujii turuu himan.Bakki kun iddoo seenaa guddaa kan qabu waan ta’eef mootummaa biraa xiyyeeffannoo argachuun Giddu Galli Aadaa kun akka ijaaramu murtaahuu dubbataniiru. Pirojeektiin birrii biliyoona tokkoon kun, waggaa tokkoo fi walakkaa keessatti ijaarramee kan xumuramu ta’uu beeksisan.Ijaarsi Galma Giddu Gala Aadaa kunis haala addaatiin hayyootaa fi abbootii Gadaatiin qoratamuu isaa fi qulqullina akkasumas saffisaan kan xumuramu ta’uu, Aadde Jamiilaan eeraniiru. Hogganaan Ijaarsa Walaabuu Injiiner Taaddasaa Dirribaa gama isaaniitiin, aadaa, duudhaa fi eenyummaa Oromoo ibsuudhaaf kan hojjechaa turanii fi amma hojjechaa jiran ta’uu ibsan.Pirojeektii ijaarsa Me’ee Bokkuu kanas yeroo dhihootti akka eegalanii fi imaanaa itti kenname yeroo jedhame keessatti qulqullina ol’aanaan raawwachuuf qophii ta’uu himaniiru. Giddu galli ijaaramu kunis kutaawwan tajaajila adda addaaf oolu kan of keessaa qabuu fi misooma bu’uuraalee hunda kan guuttatte akka ta’e ibsamuu isaa, odeeffannoon Biiroo Kominikeeshinii Oromiyaatii argame ni mul’isa.