Poolisiin daa’ima gatamee argame harmasaanii hoosisuun lubbuu baraaran maal himu?,FB Qajeelcha Poolisii Godina Harargee Bahaa”Daa’imni kun baay’ee beela’ee, afaansaas gogee, boo’ichallee dadhabee ture,” jedhu Saajinii Olaantuu Na’imaa Jamaal.Guyyaansaa Jimaata ALI Onkololeessa 28, 2018 Godina Harargee Bahaa Waajjira Poolisii Aanaa Qarsaa daa’ima ji’a afurii karaa irratti gatame arganii gara waajjira poolisii geessan.Miseensota Poolisii waqtii sanatti Waajjira Poolisii Aanichaa keessa turan keessaa tokkommoo Itti Gaafatamtuu Dhimma Dubartootaafi Daa’immanii waajjirichaa kan ta’an Saajinii Olaantuu Na’imaa Jamaal turan.Hawaasni daa’imicha qabatanii gara waajjira poolisii deemanis daa’imicha lafaa arguusaaniifi lubbuunsaa osoo hindarbin dura gara waajjirichaa akka fidan miseensota poolisiitti himan.”Daa’ima san arginaan daa’ima kiyyatu natti mul’ate” jedhu Saajinii Olaantuu Na’imaan haala yeroo sana ture yeroo ibsan.”Yeroo fidanitti daa’imni kun baay’ee laaffatee ture. ‘Nurratti yoo du’e seerri nundhiisu’ jedhaniiti nubira kan fidan” jedhan.Daa’imni lafaa argame kun gara Waajjira Poolisii yeroo geeffametti haala rakkisaa keessa akka ture kan himan miseensi poolisii tun, “Baay’ee kan beela’e, afaan isaatis baay’ee kan goge fi boo’ichallee kan dhaabe ta’uusaa argine” jedhan.Battala sanattis tarkaanfii lubbuu daa’imichaa baraaru fudhachuusaanii Saajinii Olaantuu Na’imaan himu.”Yeroo sanatti lubbuusaa baraaruuf tarkaanfiin jalqabaa natti mul’ate harmakoo hoosisuu ture. Kanaafis daa’imicha irraa fuudhee gara waajjiraa olseenee balbala cufadheen harmakoo hoosise” jedhan.Dabaluunis “Ergan harma sirriitti hoosisee booda ija banatee kan na ilaale. Achii booda buufata fayyaa geessee fayyummaasaa ilaalchisee” jedhan.Ogeeyyiin buufata fayyaas qorannoo daa’ima kanaaf taasisaniin daa’imni fayyaa ta’uu akka itti himan Saajinii Olaantuu Na’imaan himaniiru.Gama biraatiin daa’ima ji’a jahaa akka qaban kan himan miseensi poolisii kun, daa’ima gatamee argame kana akkuma arganiin baay’ee gadduussaanii himan.”Ani akkuma daa’ima kiyyaatti natti dhagahame. Poolisii taanullee nutis ummata, ummata keessaa bane. Gama tokkoon immoo haadha daa’imaati” jechuunis dubbatan.Daa’ima gatuu ija seeraatiinMaatiin daa’ima aanaa Qarsaatti gatamee argamee eenyu akka ta’an hanga gabaasni kun qindaa’utti hin beekamne.Yeroo ammaattis daa’imni kun Waajjira Poolisii Aanaa Qarsaatti kunuunsi taasifamaafii akka jiruufi Poolisiin aanichaas maatii daa’ima kanaa iyyaafachaafi barbaadaa akka jiru Saajinii Olaantuu Na’imaan BBCtti himaniiru.Gochaan daa’imman reefu dhalatan gatuu taatee yeroo garagaraatti iddoowwan adda addaatti mul’atuudha.Gochaan kun yakka ta’uu kan himan Saajinii Olaantuu Na’imaa Jamaal, gochaan kun baay’inaan dubartoota gaa’ela osoo hingodhatin dahaniin akka raawwatamu himu.”Sababni inni lammaffaan immoo gaa’ela gaa’elarratti raawwatamudha. Yeroo gaa’elarratti gaa’ela raawwatan iddoo biraatii dhufanii daa’ima gatanii deemuutu jira,” jedhan.Gama biraatiin Wajjira Abbaa Alangaa Godina Baaletti Abbaa Adeemsaa Dhimmoota Hariiroo Hawaasaa kan ta’an Abbaa Alangaa Kadir Abdaa, “dubartoonni tokko tokko osoo gaa’ela hin ijaarratin tasa yemmuu ulfaa’aniifi daa’imni yemmuu dhalatu gochi akkasii ni uumama,” jedhan.Kunis barmaatii hawaasaa ‘dubartiin tokko akkamiin osoo gaa’ela osoo hingodhatin daa’ima deessi’ jedhu ka’umsa kan godhate ta’uu himan.Dabalataan rakkoon diinagdees sababa isa biraa akka ta’e Abbaa Alangaa Kadir AbdaGama biraatiin itti gafaatamummaa seeraa daa’ima gatuun qabu kan gaafanne Abbaan Alangaa Kadir, “Waa’een daa’ima gatuu kuni kallattiidhaan seerarratti tumamee jiraachuu baatus yakkoota lubbuu namaa yookiin immoo qaama namaa balaaf saaxiluu jedhuun seera yakkaa keenya keessatti tumamanii jiru” jedhan.Haaluma kanaan Seera Yakkaa Itoophiyaa bara 1996 bahe Keewwata 574 jalatti namoota saaxilamummaa adda addaa keessa jiran kan akka dubartoota, daa’immanfi namoota eegumsafi kunuunsi barbaachisurratti yakki balaaf saaxiluu yoo raawwatame adabbii akka cimsu tumamuusaa himan.”Daa’imni alatti gatamuun sababa garagaraatiin miidhaa hanga lubbuun darbuutti saaxilamuu danda’a waan ta’eef gochi kun Seera Yakkaa keenya keessatti ifatti yakka ta’ee tumamee jira jechuu dandeenya” jedhan.Haaluma kanaan gochaan daa’ima gatuun balaaf saaxiluu hidhaa cimaan akka nama adabsiisu himan.”Haati tokko daa’imashee, daa’ima amma dhalate kunuunsuu, guddisuufi deeggarsa barbaachisu gochuuf dirqama seeraa osoo qabduu kana cinatti gochuun daa’ima gatuun adabbii cimaa hanga waggaa torbaa kan adabsiisudha” jechuun Abbaa Alangaa Kadir Abdaa himaniiru