“Galgala rafnee ganama biyya jijjiiramte argaa jirra” – Mahaammad Alarusii *************Gaazexaa BariisaaFinfinnee: Mootmmaan jijjiiramaa Itoophiyaa gara aangootti dhufuu hordofee galgala rafnee ganama waan haaraa akka agarru nutaasisaa waan jiruuf tumsi barbaachisaa ta’uu miseensi Mana Marii Bakka Bu’oota Ummataafi falmaan dhimma Abbayyaa Obbo Mahaammad Aalarusii ibsan. Obbo Mahaammad Alarusiin turtii addatti Wiixata darbe Gaazexaa Bariisaa waliin taasisaniin mootummaan jijjiiramaa Itoophiyaa akkuma maqaasaa biyya hawaas dinagdeefi misoomaan jijjiiraa jiraachuu dubbataniiru.Baale haaromsa dura maal akka fakkaattu nan beeka; amma garuu dhaqee argeen sinboonshii fagoorraa nama simata jedhanii; lammiilee Itoophiyaa miti Araboonnillee raajeffachaa jiraaachuu eeraniiru. Akka ibsasaaniitti Araboonni irradeddeebbiin gara Itoophiyaa dhufaa turan jijjiirama gama maraan galmaa’aa jiruufi bilchinni ga’umsa hoggansaa cimaa ta’e jiraachuu ragaa bahaa jira.Miidhaginni magaalotaa bifa kanaan dabalaa deemuunsaa fedhiin tuuristii gara Itoophiyaatti taasifamu dachaan akka dabalu taasisa jedhanii; jalqabbiin kun hawaasa bal’aafi dargaggootaan deeggaramuu akka qabus dhaamaniiru.Guyyuu jijjiiramoonni bullee kaanee argaa jirru waan addaati; hamma jijjiiramichi hawaas dinagdee lammiilee kan cimsu ta’etti kan jajjabeeffamuu maludha jedhan. Magaalonni Itoophiyaa hedduun misooma koriidarii kanaan miidhagaa bu’uuraaleen misoomaa guutamaafii kan jiran yoo ta’u; kana booda bashannanaaf jecha biyya fagoo deemuun hafa abdii jedhun qaba jedhan Obbo Mahaammad.Giddugaloonni bashannanaa riizoortiiwwan, paarkonni akka biyyaatti qabnu hedduun bifa ammayyaafi teknolojiin guutamanii miidhaganii mul’atu. Misooma koriidariin alatti pirojektonni hawaasa fayyadamaa taasisan sadarkaa biyyaatti babal’achuun daran kan nama onnachiisu ta’uus himaanii; tarkaanfii mootummaan gama kanaan fudhataa jiru deeggaruun barbaachisaa ta’uu dubbataniiru. “Kana yeroon jedhu mootummaan gama maraan guutuudha jechuu koomiti. bakka rakkoon jirutti mariin furaa dhimma faaydaa biyyaarrattimmoo waliin hiriiruun injifannoo ijaarsa hidha guddichaarratti galmaa’e gama maraan dabaluufi ittifufsiisuuf tumsi walirraa hincinne taasifamuu qaba” jedhan. Magaalonni keenya dur keessa darbuufillee fooliin nama hindeemsisne har’a miidhganii bakka bashannanaa bakka sammuun ofii itti haarahuufi soorqalbii ta’anii akka tajaajilan ta’uunsaanii kan nama gamamchiisu ta’uus eraniiru.Waasihun Takileetiin