Umrii kiyya keessatti akkas rifadhee hin beeku’ – F/M Birhaanuu Juulaa,Ajajaan waraana Itoophiyaa Fiild Maarshaal Juulaa TPLF akeekkachiisaniAjajaan olaanaa waraana Itoophiyaa gartuun TPLF qoccollaa taasisee ture waraana eegaluuf gahaa ture, garuu nagaaf dursa kennine jedhan.Haa ta’u malee, hunduu daangaa qaba jechuun ”Qofaa keenya waraana hambisuu hin dandeenyu,” jechuun akeekkachiisani.Fiild Maarshaal Birhaanuu Juulaa yaadannoo haleellaa Ajajaa Kaabaa waraana Itoophiyaa waggaa shanaffaa sababeeffachuun ergaa dhaamaniin kana jedhan.Haasaa daqiiqaa 40’f taasisan keessatti waa’ee TPLF, Faannoo, akkasumas haalaafi akeeka raayyaan ittisaa itti jiru dubbataniiru.Dubbiin Fiilm Maarshaal kuni yeroo Kaaba Itoophiyaatti muddamni hammaatetti dhagahame.Mootummaan Itoophiyaafi TPLF tokko isa kaaniin waraanaaf qophaa’aa jiru jechuun wal himatuu itti fufaniiru.Humnoonni Tigraay hooggansa TPLF’f amanamoo ta’an ALI Onkololeessa 24, 2013 halkan ture Ajajaa Kaabaa Raayyaa Ittisa Itoophiyaa dhiheenya Maqalee jiruurratti haleellaa kan raawwatan.Haleellaa kuni waraana akka Afrikaatti dhiigi guddaa itti dhangala’eef akka sababaattki ka’a.Sagantaa yaadannoo warra ”aarsaa” ta’an kanarratti yoo dubbatan, raayyaan ”ofii du’aati biyya itti fufsiise” jechuun himani.Aarsaan duruu jira haleellaa Ajaja Kaabaa garuu kan adda godhu ”Seenaa Itoophiyaa keessatti, tarii seenaa addunyaa yeroo jalqabaaf waan ta’eefidha,” jedhan.Badiifi gara jabina waraanarratti raawwatan jedhan kana ”yoomuu hin dagannu. Yeroo hunda kan yaadannummoo akka irra hin deebineefi” jechuunis himan.Buufati waraana Itoophiyaa kuni, Ajajaa Kaabaa, meeshaa waraanaa hidhateenis ta’e jabinaan ajajoota yookiin izziiwwan biyyattiin qabdu keessaa isa guddaadha.Haleellaa humnoonni Tigraay itti himataman sana hordofee mootummaan duula ”seera kabachiisuu” eegaluu MM Abiy Ahimad foddaa TV’tti bahanii dubbatan.Oppireeshiniin waraanaa kunis turban lama keessatti akka raawwatamuufi kanneen badii raawwatan seeratti akka dhihaatan ibsamee ture.Ta’us, waraanichi boodarra gara Affaariifi Amaaraatti babal’atee miidhaa guddaa geessise.’Rafnee hin beeknu’Fiild Maarshaal Birhaanuun waa’ee haleellaa kanaa yoo ibsan guddoo rifatuu himan.”Waraanni keenya hanga Maqalee seenutti rafnee hin beeknu. Hirribi [ijatti] nu hin gorre.”Ana dhuunfaa kiyyaan umrii kiyya keessatti guyyaan guddaa itti rifatte, guyyaan baay’ee itti gaddite yoom yoo nuun jedhan Onkololeessa 24 dha.”Onkololeessa 24 caalaa guyyaan itti rifadhe, guyyaan itti gadde, guyyaan itti boquu gad qabe hin jiru.”[Osoo] ormi si gane [homaa miti], ni mudata jetta. Lammiin si ganee yeroo garaa sitti jabaatu garuu onnee nama cabsa,” jedhanii dubbatan.Ajajaan Kaabaa waraana Itoophiyaa ergami isaa Kaaba biyyattii weerara Ertiraa jala eeguudha. Gama daandaa Sudaaniis daangaa tiksa.Waraanni kuni misooma naannichaa keessumaa manneen barnootaa ijaaruufi kaan hedduu keessa qooda qaba jechuun aangawoonni Itoophiyaa ibsu.Isarra kan darbe ”Gootota Tigraayiif siidaa dhaabuu,” illee dubbatani. ”Siidaa Hayyaloom Shiree jiru nutu ijaare,” jedhan Fiild Maarshaal.Akka yeroos ibsametti taanaan, kanneen kana keessatti qooda qaban ajajootuma waraanaa keessa kanneen jiranidha.Ajajaan waraana Itoophiyaa kuni, kanneen qooda fudhatan keessa kan ”nu ajajan, hoogganan, ijaaraa turan ” jedhan.”Mootummaan haaraadha, dadhabaadha, hidhannoo nu hanqate Ajajaa Kaabaa rrukunnee yoo guuttanne eenyuyyuu nu hin dhaabsisu jedhanii kan waraana eegalan isaanidha.”Nuti erga isaan eegalan booda fiffiigne,” jechuunis himani.Waraana Kaabaa irratti lubbuun lammiilee danuu dhumuu dhaabbileen mirgaa ni ibsuWaraanni lubbuu danuu galaafate kuni gaafa mudate hawaasi idil addunyaa mariin akka furamu watwaannaa guddaa taasisaniiru. ß”Warri adii isinitti haa hafu isaan hin dandeessani,” nuun jedhanii turan.Qondaalli TPLF maqaa qabsoo Seekuu Turee jedhamuun beekaman yeroo waraanaa miidiyaatti yeroo dubbatan ”haleellaa hin eegamne” Ajaja Kaabaarratti raawwachuu himan.Kunis, yaaddoo jira jedhan dursanii hanqisuuf ture.Fiild Maarshaal Birhaanuun ”Hirriba rafuu kan jalqabne waraannii keenya yeroo Maqalee seenudha,” jechuun qormaata keessa akka turan yeroo duraaf dubbatan.’Gujillee/ Garee TPLF’Fiild Maarshaal Birhaanuun gartuu TPLF ”Gujilee [Afaan Tigriffaan gartuu]” jedhu irra deddeebiin qeeqaniiru.Kan haleellaa raawwate ”gujilee [gartuu]” ta’uufii erga hundaa’e wagga shantama ta’uu ibsani.”Gantuu warri Masrii Shaabiyaa qaxaranii, Shaabiyaa isaaniin mindeessee Itoophiyaa waraanee ulaa galaanaa kan dhabsiiseefi biyya kan fottooqsedha,” jedhan.”Ammallee guyya guyyaatti ni gana. Humna gantummaa Itoophiyaa keessa uumamedha kuni. Humni kun hanga hin buqqaanetti Itoophiyaan nagaa hin argattu.”Waa’ee janaraala TPLF Migba Haayilee dubbatan jedhan eeruunis, ”nuti akka isaanii miti hin gannu,” jechuun himan.Ummanni nagaa akka barbaaduufi kanneen nagaa hin barbaanne gartuu TPLF keessa jiran, sanuu TPLF hunda miti jechuun ibsani.Yeroo waraana Kaaba Itoophiyaa mootummaan Ertiraa mootummaa Itoophiyaa bira dhaabatee TPLF waraaneera.Haa ta’u malee, boodarra hariiroon Finfinneefi Asmaraa yeroo laafaa adeemu, Asmaraan Maqalee waliin michuu tolfachuu eegalte.Mootummaan Itoophiyaa gartuun TPLF Dr Dabratsiyooniin hogganamu Ertiraa waliin hariiroo cimsachuu dubbata. TPLF garuu ni waakkata.”Shaabiyaa jenosaayidii [duguuggaa sanyii] nurratti raawwate jedhe waliin michummaa uuma. Kunis, gantummaadha,” jechuun Fiild Maarshaal qeeqan.’Waraana eegaluuf gahaa ture’Waraanni Kaaba Itoophiyaa lammiilee kuma dhibbaan lakkaa’aman akka galaafate gabaasaaleen adda addaa ni mul’isu.Kan miiliyoonaan lakkaa’aman immoo qe’eefi qabeenya isaaniirraa buqqa’aniiru.Waraanni kuni waggaa lama booda Waliigaltee Piritooriyaatti taasifameen xumura argateera.Haa ta’u malee, yeroo adda addaattii mootummaanis ta’e TPLF waliigalteen guututti akka hin raawwanne danqaa ta’ani jechuun himatu.”Osoo waraana barbaanna ta’e Piritooriyaa booda qoccollaan TPLF, diddaan [agarsiise] waraana seenuuf gahaadha, gahaa olidha.”Garuu waraanichaan TPLF ni baqata, ummanni Tigraay ni miidhama. Waraana darbeerrattii kan agarre isadha,” jechuun tarreessani.”Shaabiyaa waliin Tsimboo jedhee daangaa cabsanii deemuun farra heeraati. Yoo ana fudhatanii seenan malee buqqaatota hin gadhiisu jechuun faallaa Piritoriyaati.”Humna leenjisuun faallaa Piritooriyaati. Loltuu meeshaa hiikkate deebisuun faallaa piritooriyaati.”Faannoof qawweefi karoora kennitee Itoophiyaan akka jeeqamtu, Naannoon Amaaraa akka jeeqamu gochuun faallaa Piritooriyaati.”Kana hunda osoo agarruuti deebinee gara waraanaa kan hin seenne. Wanti gochaa jiran miidhaa qaba, yeroo waraanni eegalemmoo kana caalaa miidhaa qaba.”Adeemsa keessa ”namni qalbii bitu baay’atee kan qalbii hin qabne” harca’ee hafa jedhanii akka yaadan himan.Ertiraan yeroo waraana Kaaba Itoophiyaa mootummaa Itoophiyaa deeggartuus yeroo ammaa garuu bulchiinsa MM Abiy waliin muddama qabdiHaleellaan Ajajaa Kaabaa irratti raawwate ”hojii baandaati, hojii gantummaati,” jechuun kan gartuu tokko malee ummata waliin walqabatu miti jechuun ibsani.Ummanni Tigraay nu gargaaraa ture booda ”yeroo siyaasni badu, dhimmichi bade” jedhan.”Dippilomasiin rakkoo godhate, bulchiinsi yeroo rakkoo godhate, Shaabiyaan seenee dubbii balleesse,” jechuun himatani.Gartuun kuni ummata boossisuuf jedha ”ummanni Tigraay bilisa of baasuu qaba.”Gujilee TPLF, yakkamaan gujilee hiree ummata Tigraay murteessuu hin qabu,” jechuunis himan.”Hammamuu obsinu yoo haleellaan nurratti raawwate akka Ajajaa Kaabaa yoo ta’e ofirraa ittisuun keenuya hin hafu.”Qofaa keenya waraana hambisuu hin dandeenyu,” jechuun garuu ”yoo guutee dhangala’e garuu homaa gochuu hin dandeenyu,” jedhan.”Hin jarjarru, waraana hin eegallu, hin barbaannu. Nagaa, misoomaafi fedhii biyyaalessaa keenyarratti kan dhufe, daangaa kan ce’e garuu loluu qabna.”Kan ijaaramnees, kan hindhannees kanaafi,” jechuun himani.Abbaan seerummaa isaa Boordii Filannoo Biyyaalessaan kan duraa haqame TPLF, ibsa baaseen mootummaan Itoophiyaa ”waraana biraa adeemsisuuf ifatti sochii” gochaa jira jechuun himateera.Hawaasni idil-addunyaa sochii adeemaa jira jedhe kana akka dhaabsisuuf gaafateera